Big time producer from farin send money fi Jamaican entertainer get out papers fi do big show. Yes mi chile, entertainer seh send money cum fast through Western Union and money did reach. But, hear this. Entertainer tek money, buy bashment clothes, fix him house top and gi baby madda. Now, weh di juice entertainer a go tell producer. And which entertainer yu a ask. A di same one weh a chat bout him change.
Running Manager
Dem massa yu eva see Vegas Manager a run wen dem seh fite bruk out? Massa people seh one foot deh forward an di odda a go backward and weh him did a run towards di fence far him caan climb deh so. Man afta everything cool down laufing spwile. Yes mi chile people seh dat time Vegas cool like cucumber and Q45 seh, mi naw run, afta mi nuh ave no gun.
Chatting up Yellowman
Mi chile wat was Yellowman doing uptown wen di two girlie a chat out him daylight. Mi chile dem look pon Yellowan from head to toe den a ask weh di chain fah round him foot. Den
massa wen
Yellowman tun round massa di susser dem gi him a special round of smile. Yellowman run him hand through him pocket and guess what, nuh money nuh come up.
Scandal
Massa unu see di latest scandal downtown, Yes man unu fi walk and look pon wall for unu wi learn sinting. Well some seh a true but massa dat di scandal is sinting fi ponder for who never get ride a chat and who get ride a go pay fi roast a bwile. Dem seh a oonly hope dem did walk wid dem boots.
Bounti needs hit tune
Bounti Killa one a yu fan name Girlie seh yu fi find a hit tune. Yes man for Baby Cham, a galang bad out deh and certain people a boost him. Yes Bounti dem sayyu affi cum betta dan di last time. Cum wid sinting weh can tan pon di chart twenty weeks! Dem seh yu affi goinna di hills go study fi dat.
Busy Babsy
Den massa neyga people can gi Babsy Grange basket fi carry water fi true, Yes massa for dem a try get har pon cellular and dat a ring without answer. Dem a call har office and dem seh Babsy not there. Some seh she gone a Hollywood gone cool out. Not a ting nuh go so Babsy deh a Gordon Wood a help poor people.
Calling Jack-a-Diamond
So people deh backstage a look fi Jacka-Diamond fi go pon show. Dem a ask promoter if a mistake meck and him name lef off. Yes mi chile dat time smaddy seh Jack-A Diamond certain place a hug up one pregnant girl. Now, she could be Jack_a Diamond cousin so nuh bother go spread nuh rumor.
Alozade's hot hairstyle
Wat a hair style. People seh dat is no chiney-bump it must be a coolie bump. Massa people a chat seh wen Alozade cum affa stage him head almost look like, weh di movie star name again. Mi nuh memba.
Run 'gainst promoters
So dem learn dem lesson. The two promoter dem weh plan fi flop Teen Splash flop out for massa Montel hear seh ebrybody dress like puss pass fi dem show fi go a Teen Splash. Massa people seh dat fi happen for dem too bad mind an run 'gainst.
Advice for Elephant Man
Oh Elephant Man people a chat yu seh yu nuffi badda start di run up and down and climbing again for yu wi pop weh yu nuffie pop. And massa inna these time some bruise nuh well easy. Dem seh yu fi tan pon stage an do yu performance.
