Hotta flex! A whey dem feel like? Mi no business who waan vex! A mi have di vice grip, de right grip, di nice grip. A mi meck 'im talk foolishness, before, during an afta!! A fi mi name im bawl out, a my name 'im call out! A mi have 'im lock! Im naah confuse mi wid nuh baddy else! Chat 'bout!!
Dats why mi have mi Platinum Visa credit card in both U.S. and local currency, an das why a him a pay di bill a month time!! 'An dats why I'm island hopping!! Talk up to me!!! A girl's got di right remedy!! Yeah, whey di res' dem deh?
Sen' on di suss!!
STAION IN DEBIT
How di radio station fi owe one announcer all $300,000? Dat a down payment pon house!! Mi here say who naah lef', a sue. If unno broke, lock dung di place or sell it out nuh!! Cho!!!
DJ AN' RAPE CHARGE
A true? Mi hear say di DJ barely get whey offa di rape charge by di skin a 'im teet. But a how it really go? How unno a move so? Get some credit 'an link mi 'an tell mi what a gwaan!!!
MORGUE LOCK SHOP
Unno memba Percy Funeral Home whey did haffi lock dung afta govament owe dem straight into bankruptcy? Madden's is nex' in line, but dem say dem ago draw di line, a cut off credit afta nex' Thursday. A wha di govament a go do wid di dead dem? Dig one hole an put everybody? Mass burial? Wha yuh say, likkle Haiti? Either dat or we finally fin' a solution to di high murda rate. It may be cheapa fi di govament pay di shotta dem fi no kill nobody, so dem won't have no body storage problem.
IVAN FOR COUNCILLOR
Di Portmore Mayor betta give Ivan a seat inna 'im council. Di big bad hurricane blow dung all a di illegal sign board dem whey im did a plan fi teck dung. All 'im affi do is ensure dat dem don't put dem back up!!! So Ivan did do some good!!
STUDENTS' WOES
But di govament brand di hurricane Ivan di Terrible, but it look like some wickeda tings deh 'bout dan di poor misunderstood
hurricane. Lawd have mercy!! How poor people pickney fi strive without higher education? A wah really a gwaan uppa UWI? How dem fi waah throw out di people pickney dem outa de noble institution cause dem no pay di school fee yet? Imagine Miss Dulcie a Portland Cottage, Rocky Point, Cave Valley or Bigwoods whey lose di house an' everyting inna di hurricane. Everynight she lie down unda di pieca a
tarpaulin an' look up pon di stars an' console herself say di pickney inna 'im final year, so' im soon come out come get di big wuk fi buy one decent house put har for di govamant sey dem nuffi buil' back no house down deh. All di likkle money she di get from di pardna draw put wid what she di have put oneside from when di crop did come in, and buy up few likkle tings 'an sen' back di pickney a Kingston an' say when tings pick up inna Octoba she woulda try see whe she coulda do towards di school fee. Now as she a box whey di mosquito dem fram har ears she a wonda wha she a go do when di pickney come home nex' week come push har affa di piece a damp sponge. It dread on yah!!!
NO CASH?
Now unno listen, an' listen good, how di hell di post -Ivan reconstruction company fi run outta money before it even open? A whey di!!??? Dem start filter di funds aready? A ongle Jamaica alone dat coulda happen!!
Now mi want unno talk up to me. Di Haitian dem deh yah, how long? 'Bout six months? Den my God, wha meck dem wait 'til di people dem country pap dung wussa dan how it was before dem lef', when people ova deh a sleep inna tree an' pon housetop and a drink water whey dead people inna, fi tell dem say dem haffi go back home? Jeezams crimes, wickedness rampant!!! Whey dem a go back home go do? Starve? Wait pon dem turn fi dead? Eat dem one anadda? Whoii!!!
QUESTION TIME
A wah Wata Commission feel like? 'Bout di water still not safe? A who dem tink can afford fi buy bottle wata fi so long? 'An who di hell can afford fi boil so much drinking wata fi 5 minutes 'an a no cook wi a cook? An' no badda talk 'bout bleach, 'cause dat don't taste good! Hands up all who start drink di pipe wata from it no brown again!!!
What a day when di tables turn!! Yuh see how it feel to be di one being hunted? Afta yuh pap dung di people dem career an' incite hatred against dem, now dat bounty (no pun intended) deh pon yuh head, yuh a fret? Yuh see how di shoes squeeze tight when it deh pon di odda foot? What's dat about glass house?
A which govament agency haffi bow an' scrape to di big drinks company afta dem tell di public nuffi buy dem drinks?
My girl, how yuh fass so? Why yuh caan min' yuh business? Oh, mi figet say yuh no have any. AnywayGive it up, Dat bigga dan yuh, yuh caan do nuttin' fi stop it, di man naah lef' im girl. Mi know say it bun yuh, but yuh haffi jus' hug it up.
Poorness plus tax!!! A which UWI student mi hear say run outta 'please call me text', an' call Digicel a beg dem fi top up dem free text allowance without success?
BIG UPS
Big up di people dem whey no have, no house no money, nuh food an' still a hole di strain. Big up di politician whey chat whole heap. Him decide say 'im naah go run fi di top position. Smart move!!
Big up Danville Walker, 'im have 'im work cut out fi 'im. Talk 'bout basket fi carry water!!!! Di poor man mussa soaking wet by now!!!
Big up Lady Saw. Howard Stern!!! Teck yuh props. Yuh still a force to be reckoned with. No warmed ova Diva nah come flop your career!! Yuh still in di mix!!
Big up di Back Yaad crew. Wicked, wicked show di odda night!! Take a bow.
Big up di govament. A dem alone coulda launch a agency whey bruk dung before it start help anybody.
