By Amina Blackwood Meeks, Contributor 
Beenie Man (left) and Vybz Kartel (right)
DEAR BEENIE Man, Vybz Cartel, Solid Agency, all Purveyors of Gun Lyrics, Degrading-to-Woman Lyricists and other Distinguished Members of Gay-Truce-Signing Fraternity, Anancy had a big head pikney who did name Big Head. Him never suppose to shake him head on account of de likkle neck what did kotch it up. Dat is a wicked ting to do to a person gi dem a big head, a likkle neck, de admonition not to shake de head an den gi dem nuff ting fe shake it bout. Yu see if me was Big Head, me sorry fe meself in de last few weeks for dere has been a bumper crop of head-shaking tings. One of dem is dis truce dat de reports say unnu come to with the international gay community on account of all the distinctly unhappy sentiments that, prior to now, unnu express bout dem dat cause dem great distress.
I don't rightfully know why unnu dweet for is not everything good fe eat good fe talk an nuff tings what done in de dark can never face de light of day. Me did tink seh unnu cudden help unnuself an did mus an compel fe sing certain tings. But it nuh look so again. So, if it is dat unnu come to de error of unnu ways an decide to repent den salvation deh-deh fe all a we an me joyful dat yu find yours.
WHAT ABOUT WOMEN?
Hear wha me ask unnu doagh, unnu ever hear any hooman sey de lyrics dem what unnu write, produce and market bout hooman is a grave injustice before God and all kine a man? Well me is wan a dem who a say it long before gay man shut dung unnu money-earning capacity.
Woman have more use dan fe cook, fe wash and clean an give de wickedest slam. Dem jus doan have de money power of gay society. Tek your wife or woman or maddas, tek yu teacha, teck Miss Lou, Edna Manley, Mary Seacole, teck Nanny. Any truce deh fe how dem deh lyrics dishonour how dem hole dis place togedda till yu bawn come
inherit de likkle much wha dem struggle fe leff an can come pon teevee an inna paper. Yu know how dem sacrifice fe teck black people affa back page, fe move de stigma seh we is some savage who kean tink above we waist?
Tek yu likkle baby daughta now. Any truce deh fe how de lyrics dem a teach har seh har fada tink seh she no betta dan a floor mat? Any truce deh fe how de likkle bwoy dem whey a grow up roun har a learn seh if har fada nuh tink seh she betta dan dat dem nuh haffe tink so neida an nuh haffe value har beyond de size of har booty an how much she can shake it? Dat she so cheap she can be bought and sold, just replace de slave ship wid de trailer load. Furdermore dat de badder de buyer, de more murder him commit, de more gun him have is more de trailer full?
VIOLENCE
Yu a hear me again? All dem tings unnu siddung an compose an laff bout an meck money affa regarding what and what badman can do, "bore skull meck head open like umbrella" an dem tings deh, unnu bound an compel fe sing dat? Unnu ever one day consida fe call a truce pan dat an write someting bout what a good man can do? Or unnu nuh know none, nat even unnuself?
Me see badman cry pan teevee arreddi. Tremble how him kean even sen him children go school. Weep, how him kean even go visit certain ones and ones. Me see inna newspaper seh when police go fe badman him wet him pants an beg fi him life.
Me see hooman and man and pickney haffe put dem two likke belongings inna hand cart an flee chu de works of nuff similar badman. Unnu really mean fe celebrate, promote an perform dat as entertainment?
Yu see up into Kilancholly in St. Mary, dem jus bury three beautiful children. De two likkle girls did have ambitions fe demself dat was more dan de wickedest slamming dishwasher an de likkle boy was reaching fe anyting and everyting name goodness. Me nuh know if unnu wudda cry still if unnu ever hear how dem madda struggle wid dem so dem cudda turn out to something dat Black people cudda proud of, but she dida try wid dem so dat wan day dem wudda put proper food pan fe har table just like how unnu proud fe put food pan fe unnu madda own. An she never haffe treaten dem wid big stick fe dem come to dem senses, like how International group haffe treaten unnu. But de police report seh de man what allegedly do de ack seh him was hearing voices. Yu tink seh your voices did feature into de mix?
GUTTER RUNNINGS
Undastan me clearly, me naw seh unnu is de sole cause of de gutter runnings roun here. But when gay man seh dem nuh so happy wid unnu, aldoagh unnu dun doan sey Church and State nuh condone dem neida, unnu call truce pan what unnu contribute. Is jus dat me a beg unnu. Call a truce pan whey unnu contribute chu certain lyrics, to de blood inna de streets and de disrespect fe wi wan annedda especially we women and children.
Call a truce fe de sake a de elders dem who cannot afford de price a wan a unnu kyar tyre but never yet reduce demself to de bankruptcy of chuck a man inna chest fe get ratings; who bigger dan fe go malice off anybody over who famous and who popular, fe haffe come pan teevee fe explain how it go. We a drown inna de tears now man. Call a truce an see if yu can save some a we. We know seh yu can hype up badness. Call a truce fe goodness an meck de whole a we see what good men can do.
