Amina Blackwood Meeks, ContributorIT LOOK like Likkle Miss Jing Bang never satisfy wid all de parangles she carry on wid pon Good Friday. So she trying again pon Easter Sunday.
You ever hear sey if you want to know what the future holds Good Friday is a good day to find out? Yes. Yu wake up early an jus before de sun fully rise yu get a clean drinking-glass an full it up wid pipe water, dat mean room temperature water as opposed to fridge water. Den you carefully crack open, better meck dat break open yu hear for KingFish might only hear de word 'crack' an swoop dung, you break open a fresh country-fowl egg. Modern day genetically modified egg will not do. Jus like how currency a sing to Missa KingFish fe meck sure him ketch de right fish, meck sure yu get de right egg. Good. Discard de yolk, scramble it fe breakfas if yu like, an pour de white into de glass of water. Leave it into a cool secure spot, undisturbed till mid-day. As soon as mid-day come, check it. De egg will form out into a shape dat is indicative of the future, not necessarily yours, maybe somebody yu know or yu could also get a message for somebody you don't know.
WEDDING CAKE
Maybe it will form out into a wedding cake. Dat mean somebody getting married. Or a ship. Dat mean somebody travelling, perhaps going on a cruise an dat is not you for cruise is a big-money ting. It might form out into a plane. Dat mean you doan undastan how Air Jamaica still have class one ratings from de FAA, healthy financial status from de Minister Doctor of Money an still have to lock down certain routes aldoagh de weddaman forecast a cumulus cloud of tourist ready to rain down pan we head accompanied by plenty dolla signs.
So if yu get a sign like dat into your Good Friday divination you might be a likkle reluctant to go warn anybody. Warning message must be crystal clear. So you will understand why Good Friday gone Jing Bang never tell anybody into official-dumb dat de egg into her glass form out into some soldiers from United Nations, waving some Bush and declaring dat dem come to help wid de war. Message unclear. Plus de egg in de glass ting only work on Good Friday. Jing Bang sey she doan have a whole year to clarify dat so she trying some tings for Resurrection Sunday.
She get a rabbit foot. Dat is a symbol of fertility. Jing Bang sey something new have to born in dis place. Den she get har granny ole shoes, dat is a symbol of a desire fe walk de right path. She throw in some ole coins now dat have value to people who colleck ole coins as a symbol of prosperity. An she throw in a cross, one dat doan have Jesus pan it, from de days when dat de mean sey him nuh ded an heng up pan no cross but him resurrect an gane bout him business or him fadda business like a living smaddy whey have work fe do an no time fe siddung pan sidewalk, han pan jaw jussa wanda till Devil come fine wuk fe fe him idle hands. Den she put everyting into a big yellow enamel pudden pan of water, wid some cake soap stop up de hole so dat de water daon leak out. She call dat her Divining Bowl. Har granny did tell har bout some people into Africa who use to put tings like dat into a bowl and bring forth mystical knowledge to diagnose an cure all kine a tings ascording to how de movements of de objects prescribe. Den she put in some sweet-smelling kanaga water as a symbol of the young women, flowers of the nation, who a meet some brutal tings that is causing dem to fade when is bloom dem fe bloom an grow. Finally she put in some odda secret ingredient an start walk round de pudden pan chanting de name of Tacky, de man from St. Mary, who did choose Easter time as a time fe cleanse de nation dem time of tings dat was deleterious to people an cause dem to tink up tings like bun a fiah pan plantation, jump a Nyahbingi pan a Slave Master an set de captives free fe live like human beings.
IDEA
Him mussi did get de idea from a man name Bussu into Barbados who did choose a same Easter time fe mek it be known dat de conditions under which certain people did keeping certain odda people was a condition worse dan death an him was leading dem to demand a resurrection. Yes, him was demanding sey dese certain downtrodden people was to be elevated to de status of human beings. Dat is de same challenge now as how Jing Bang see it how fe resurrect de soul of the nation to a point where gunman know sey people a nuh bud an even bird season a nuh open season, an police an soldier fe know dat too, an all Ministers of de Public Business mus know sey de poor is part of de public too even when is nat voting time. An she know sey nuff a unnu tink sey she completely lose har mine now wid dis whole heap a superstition. Well she sey she glad unnu recognise sey it 'super' an furdermore fe unnu 'stishon' doan seem to be working. So wheel an come again, try likkle a de ancient superstition an see if we can ward off de soldiers from United Nation.
