Everyone dey cry out
Eas, Wes, Nort an Sout
Dem dey cry fe peace
Peace
Dem mine caan be at ease
Everyone dey cry out
Jamaicans in Canada
New York, Florida an Britain
An many other countries to
Wha happen eena Jamaica
Affect dem too.
Dis a fe dem country
Dem roots
Dem born unda de clock
Eena de hut
Or upa Beverley Hills
But dem luv Jamaica still
Dem memba de rivers.
Whey dem always bathe
dem mine di water always soothe
So whey me country dey
A dat dem dey ask
Fe si dung late a nite
Fe play de dominoes
Hav a good chat
An fe go luk fe granny eena de ghetto.
Walk wid dem sweetheart pan de road
An nuh fraid
Dem sey now would a too dread
A dat type a life dem memba
A dat type a life dem did luv eena Jamaica
De good life
De luvin life
Dem sey dem ya pickney
Nuh know nice times
Dem life unhappy and dem naah lib too lang
Jamaicans everywhere dey cry out.
Peace, peace, peace!
Barbara Dixon
