Amina Blackwood MeeksLIKKLE MISS Jing Bang go complain to Miss Lady bout de whole heap a people who jus seem to be im malice wid dem one annadda. Big malice not jus a temporary witholding of speech. Ascardin to har malice is when yu have up somebody into yu heart, bex wid dem, decide fe write dem off. Dat time now yu haffe go out a yu way fe constantly remind yuself is what dem do yu why yu malice dem, watch dem everyday an expan de list of reasons why yu haffe kip dem at a distance. Den yu haffe meck sure dat dem know sey yu have dem off for if dem doan know yu wasting yu malice. So yu practice a special kine a Jamaican cut-eye fe when yu see dem a come, invent some choice wud fe sey when dem in earshot.
Pickney haffe talk out loud sey dem nuh like big people chu how dem lie and ole-fashion an have double standards an big people talk out sey dem wuss nuh like pickney chu how dem aise-hard an own way an gwaan like big people an jus come yah fe come mash up big people good family structure an bring dung curse pan de lan.
Students nuh like how teacher kean teach an waan dem fe tink before dem jus gi dem de handouts wid de answer to every question pan it an a come teach dem tings what irrelevant an gwaan like sey dem kean see sey dem meck up dem mind nuh fe learn dat, an teacher wuss nuh like dem chu dem jus come a school fe warm bench an eat lunch an bex wid teacher an fine fault till graduation time an turn out to nutten an discover when it too late sey dem nuh have nutten fe contribute to nutten.
SUNDAY DINNER
Police nuh like citizens chu dem won't tun informer an consequently police haffe outa road till all hours a try investigate tings fe demself an miss dem good Sunday dinner wid dem family an kean even stap fe help dem pikney wid dem home-work an have dem family a fret bout if dem gwine come back home an citizen nuh like police chu de amount a fe dem family memba what police cause fe can never come back home, before dem go ketch de real criminal dem who a bruk people shap an teef de farmerman cow an sell him pikney an rinse off de proceeds of de sales fe hinder people fram track which part in come from, den come cock up foot in a life of respectable criminality an invite all some a de same police fe eat cupcakes to die for an drink drinks wid labels dan kean pronounce at after-any-an-everything cocktail party.
GRIEVANCE
She sey everybody bex chu dem have summuch grievance an nobaddy fe listen to dem an teck dem serious, consequent upon which it doan even look like dem like de whole heap a talk-show dem what people jus call-call up fe run up dem mout wid talk-show host bout how everybaddy an everyting terrible an awful, ongle dem one a try fine something good fe sey dat's why dem is up pan de air five hours a day a pint out to adda people how terrible an awful dem all have become.
JB sey she get fe fine out dat nat liking somebody is a precondition of de malice. Dem tings dere must be de result of some bad heart conditioning an she naw condition fe har heart to dat. So she is withdrawing into a likkle space where she can find something fe love.
A so comes it dat Miss Lady encourage har to go dung to de artshop an buy herself de biggest pack a putty she can fine. For it come in to har like sey if yu waan something dat yu can love an have good tings fe sey bout, yu is going to have to fine de way to meck it, jus like how it come to har like people deliberately already meck tings what dem doan like but nobaddy will admit sey is dem did meck it. So JB is mecking a village wid people she can love. De firs numba one smaddy she going to meck in dere is a midwife, a good ole-fashion one who use to go to people yard an born dem pan dem granny bed.
Oh yes, dat mean sey she is going to have to meck de granny bed to, a warm place of wisdom an love. Den she is going to meck de road where de midwife walk back an fort fe as many years as it teck fe meck sure sey de baby grow up into a smaddy dat know dat adda people did care fe do everyting fe meck sure dem tun out into something proper.
Den she is going to meck a likkle lady a kip school pan har verandah an serve parridge to a whole heap a pickney a meck nize an jump up an sing out dem times-table an sey some memory gem an throw in some useless nursery rhymes an dream how dem going change de world wid dat. Dem she ahffe meck some people a pass pan de road or look over de fence an tink sey dat is de nicest ting dem ever see fram dem bawn.
PROVISIONS
Afta dat now she is going meck de policeman who show de pickney dem how fe cross de road an walk two abreast pan de sidewalk an go straight home to dem parents. Den she mus have de Poas Missis who a wait fe gi de pickney de letta what jus come fraom farin fe him parents an de pickney haffe learn fe responsible fe meck sure sey it nuh get wet or dirty an it daon laas an him daon open it an gi it to him parents as soon as him reach home. Den she a go meck de madda an fadda a come home from dem grung wid de provisions what dem grow an haffe go home go meckase cook before de pickney dem come home.
Den she is going to buy a whole heap more of de putty an have a party an invite ongly people who want to come an meck something dat dem can love.
