Cordella Lewis, Contributor

When Miss Lou tep up eena jumaican bus

She si market ooman 'pread dem apron

Ova dem bankra full a bickle

An da dress dung demself pon de seat

Fa de one Miss Braggadaps was a-come, inna heat

Fi show-off, pap style, and meck some fuss.

When Miss Lou tep crass de street

She si mawga dawg fava real-real dog

Tief walks een an gawn wid two-poun-ten

Plastic cigarette case, cyar licen' and fountin pen

Corpie run im dung me chile

So im flee a country go pap style

Call im fada 'poo',

bad wud fe troo!

When Miss Lou tep up pon Ward Theatre stage

It no matta yu position or age

Howdy and tenky bruk no square

Even peel neck jancro hab no fear

Mi dear!

What a rig-mi-jig an palampam

When Miss Mout-a-Massy an Maas Ran

Join har in dem stripe and plad

So dat yu no stress an sad

Dem buss you glad bag!

So when Miss Lou reach pon Worl' Stage

Wi lickle island come of age

Graduate from tie-tongue an stamma

Lick dem wid de patwa hamma

Wid sunshine smile an island breez

She reverse de colonisation freez

Shi free up wi langwidge nice an sweet

(Aldo' a no really she-one dweet

'Memba Claude McKay!)

Now Miss Lou gone teck recline

Under coconat tree inna evening time

Har work is ova but it just begin

Saint Peter ready wid bans a chalk, up dere

Him know shi gwine go walk an talk, bidout fear

So im lef de gate opin (undastood?),

so we all cyan tell har WALK GOOD!

Cordella Lewis